Salcedo misugyot nga i-revisit ang Solid Waste Management Ordinance sa syudad

GILARAW ni konsehal Eric Salcedo, chairman sa komite sa environment, nga i-revisit ang Ecological Solid Waste Management Ordinance sa tinguha nga mapagaan ang problema sa basura.

Kini ang unod sa special report ni Konsehal Eric Salcedo atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Salcedo nga usa sa nakita niya nga solusyon sa problema sa basura mao ang paghatag sa dump truck matag barangay ug ang pag-deputize sa barangay pinaagi sa pag-isyu sa Ordinance Violation Receipt kon OVR aron mahimo kining epektibo ug striktong ipatuman ang insaktong paglabay ug pagkolekta sa mga basura sa barangay.

Lakip sa gilantaw ni Konsehal Salcedo ang pagmugna sa kaugalingong opisina nga maoy mag-tutok sa problema sa basura ug pag-penalize sa mga kontraktor nga dili motuman sa ilang tahas subay sa gabayan sa Dakbayan.

Malaumon si Salcedo nga pinaagi sa kooperasyon sa tanang sektor sa katilingban diin magsumikad sa mga household diha sa insaktong pag-segregate sa basura, mapagaan ug makunhoran ang problema sa basura sa dakbayan.

 Ang maong taho ni Konsehal Eric Salcedo giduso ni Bise Mayor Bebot Rodriguez ngadto sa komite sa environment alang sa dugang pagtuon ug rekomendasyon. (MLRapanot/SP)