Salcedo mipahimangno sa taga-RTA sa pagtultol sa trabaho

GIPAHIMANGNOAN ni Konsehal Eric Salcedo, chairman sa komite sa public utilities ug Overseer sa Roads and Traffic Administration (RTA) ang mga personahe sa maong buhatan nga motultol sa ilang mga tahas ug likayan nga mahilambigit sa paggamit sa gidiling droga aron dili maapektohan ang ilang panarbaho.

Kini ang gipaambit nga pamahayag ni Salcedo human adunay nadakpan bag-o pa lamang  nga aktibong sakop sa RTA nga giingong namaligya og gidiling droga diha sa Barangay Canitoan ning syudad.

Matod ni Salcedo nga dili magpanuko ang opisina sa RTA sa pagpahamtang sa tukmang silot niadtong mga kawani sa RTA nga galagoy sa ilang trabaho ilabi na kadtong mga personahe nga nalambigit sa ilegal nga binuhatan.

Dugang sa konsehal nga dili malilong nga adunay pipila ka kawani sa RTA nga wala gatultol sa ilang trabaho ug kinahanglan kini nga mahatagan sa seryosong pagtagad. 

Siya midugang nga may taho siyang nadawat nga ang uban bantayan ang pagpahigayon sa random drug test aron dili sila masapon sa ilang hiwi nga binuhatan.

Niini gipasalamatan ni Konsehal Eric Salcedo ang buhatan sa PDEA-10 sa ilang hugot nga kampanya kontra ilegal nga droga dinhi sa Cagayan de Oro. (MLR/SP)