Salcedo mipahimangno sa MORC nga mintinahon ang kalimpyo

DILI magpanuko ang komite sa environment ni Konsehal Eric Salcedo sa  pag-rekomendar sa pagpasira sa Misamis Oriental Rendering Corporation dihas Upper Puerto kon dili nila mamintinar ang kalimpyo sa ilang dapit tungod sa mulo sa molopyo batok sa baho nga inalisngaw sa ilang planta panahon sa operasyon.

Kini ang gipahimangno ni Salcedo sa tigdumala sa MORC atol sa tigom sa komite diin nagpadangat sa ilang report ug rekomendasyon ang mga kawani sa City Local Environment and Natural Resources Office sa ilang gihimong pag-monitor ug inspeksyon sa maong kompanya.

Gitahasan ni Konsehal Salcedo ang mga kawani CLENRO nga himoon ang regular nga pagsusi aron masuta kun mituman ba ang maong kompanya sa gabayan ug lagda nga gisitar sa balaod.

Nunot niini, gihangyo sa konsehal ang CLENRO nga mosumite sa resulta sa ilang himoong inspeksyon ug rekomendasyon alang sa tukmang aksyon. (MLR/SP)