Salcedo mihangyo sa motorela operators nga prayoridad ang PWDs

GIHANGYO ni Konsehal Eric Salcedo, chairman sa komite sa public utilities, nga hatagan sa prayoridad ang mga tawong adunay kabilinggan sa kinabuhi o PWDs nga pasakyon kon magpara diha sa kadalanan.

Kini ang hangyo ni Salcedo atol sa tigom sa komite niadtong milabayng adlaw sa mga motorela driver, diin iyang gipahibalo nga adunay ordinansa niini nga matang sa maong operasyon ug mag-atubang og silot kadtong makalapas sa maong balaod.

Siya midugang nga na-obserbahan diha sa kadalanan nga adunay pipila ka mga driver ang pakyas sa pagtuman sa maong balaod sa syudad hinungdan nga hugot kining ipatuman.

Subay niini, mihatag og kamanduan si Konsehal Eric Salcedo sa mga opisyal sa Roads and Traffic Administration (RTA) nga dakpon ang mga driver nga mobalibad pagpasakay sa mga PWDs. (MLR/SP)