Salcedo mihangyo masusi pagpatuman sa parking areas dihas Cogon

GIKATINGALA ni Konsehal Enrico Salcedo, chairman sa Komite sa Environment and Natural Resources, ang pamaagi sa pagpatuman sa Roads and Traffic Administration (RTA) sa No Parking sa mga dalan sa syudad ilabina diha sa dalan Osmena duol sa merkado sa Cogon.

Kini ang gipadayag sa konsehal human si Konsehal Roger Abaday, sa sesyon sa Konseho niadtong Lunes nga gidumala ni Bise Mayor Kikang Uy, mitaho sa mulo sa pipila ka mga negosyante nga maglisod pagparada sa ilang mga salakyan lakip na ang pagkarga ug diskarga sa ilang mga produkto.

Gibutyag sa konsehal ang iyang kalibog nga gipatuman ang parking sa dalan Osmena duol sa merkado sa Cogon nga piot ang maong dalan samtang gidili ang pagparada sa mga sakyanan dinha sa dalan dapit sa Barrio Gaisano nga unta luag kaayo ang dalan.

Nanghinaot si Salcedo nga makonsiderar ang iyang obserbasyon ug mahatagan sa igong pagtagad tungod kay daghang mga motorista ang naapektohan sa gipatumang balaod sa RTA.