Salcedo miaksyon sa mulo sa taga-Balubal

DALING giaksyonan ni Konsehal Eric Salcedo, chairman sa komite sa environment and natural resources, ang mulo nga gipaabot ni Benjamin Sumandig ug mga kauban diha sa Mambatangan, Balubal.

Sa milabayng tigom sa komite, gipaabot sa mga molopyo ang reklamo kalabot sa baho gikan sa Misamis Oriental Rendering Corp. (MORC), usa ka planta nga nagproseso sa mga parte sa manok nga himoong sangkap sa bahog sa kahayupan.

Gipasabot sa mga residente nga labihan gyud ka baho ang ilang masimhot gikan sa maong planta nga nakahatag og peligro sa ilang panglawas.

Niini, ang representante sa korporasyon mibutyag nga aduna nay mga lakang nga ilang gipatuman apan nasayran nga sa kasamtangan anaa pa gihapon ang baho.

Sa tinguha nga makita gayud ang aktwal nga sitwasyon, ang komite ni Salcedo mopahigayon og pagsusi uban sa CLENRO ug uban pa sa labing dali nga panahon aron matino ang maong reklamo.

Ang maong tigom gitambongan usab nila ni Konsehal Edna Dahino ug Konsehal Bong Lao.