Salcedo gitahasan ang CLENRO nga monitoron ang Tencil sa pagkolekta sa basura

GITAHASAN ni Konsehal Eric Salcedo, chairman sa komite sa Environment, ang mga kawani sa City Local Environment and Natural Resources Office nga monitoron matag-adlaw kon natuman ba sa Tencil ang ilang schedule sa  pagkolekta sa basura sa kabarangayan sa syudad aron masiguro nga aksyonan nila ang ilang obligasyon base sa kontrata.

Kini ang gipaabot ni Konsehal Salcedo atol sa tigom sa komite diin gidapit ang tigdumala sa Jomara Construction Corp./ Tencil aron sa paghatag sa katin-awan sa giatubang nga problema sa koleksyon sa basura sa dakbayan.

Sumala ni Salcedo nga  iyang hangyoon ang iyang kauban sa komite nga ilang erekomendar ang dili pag-renew sa  kontrata kun masuta nga adunay kakulangon sa gikinahanlang rekisitos ug wala gituman sa Tencil ang ilang tahas ug obligasyon subay sa gilagdaan nga kontrata sa syudad.

Niini malaumon si Konsehal Eric Salcedo nga masunod na sa Tencil ang ilang schedule sa pagkolekta sa basura ug adunay igong mga dumptrucks ug manpower nga mukuha niini aron malikayan ang mga mulo sa katawhan bahin sa maong isyu. (MLR/SP)