Salcedo gipasusi giingong ilegal terminal sa bao-bao dihas Brgy 37

GITAHASAN ni Konsehal Eric Salcedo, chairman sa komite sa Public Utilities, ang opisina sa Roads and Traffic Administration (RTA) nga imbestigahan ang giingong gihimong ilegal terminal sa bao-bao dihas Barangay 37 taliwala nga wala kini gihatagan og  prankisa o panugot nga makapamasahero gikan sa buhatan sa Land Transportation Franchising and Regulatory Board (LTFRB).

Kini human nagpadangat sa ilang reklamo sa komite ang Camaman-an Operators Drivers Association Multi-Purpose Transport Cooperative (CAMODA_MPTC) sa ilang ilegal nga pagpamasahero nga naka-apekto sa ilang matag adlaw kinitaan tungod sa maong matang sa  operasyon sa bao-bao sa dapit.

Gipasabot ni Salcedo nga dili mahimong magpadayon ang nasangpit nga operasyon kun makita kini nga adunay kalapasan sa lagda sa balaod sa trapiko.

Nunot niini gihanyo ni Konsehal Eric Salcedo ang mga kawani sa RTA nga susihon og mohimo sa makuting imbestigasyon kabahin sa maong isyu og isumite sa komite ang resulta ug rekomendasyon. (MLR/SP/Photos from Councilor Salcedo FB page)