Salcedo gihingusgan tun-an pag-amendar sa Traffic Code sa syudad

GIHINGUSGAN ni Konsehal Eric Salcedo, chairman sa komite sa public utilities nga tun-an ang pag-amendar sa traffic code sa syudad diin daghan sa mga balaod niini ang wala hingpit nga mapatuman samtang ang uban niini angayan amendahan.

Kini ang gipaambit nga panahum sa konsehal agig reaksyon sa gipadangat nga special report ni Konsehal Jonjon Rodriguez atol sa sesyon niadtong Lunes nga gidumala ni Bise Mayor Bebot Rodriguez mahitungod sa pag-implementar sa truck ban sa mga major roads nga usa sa hinungdan sa kapiot sa dagan sa  trapiko sa Dakbayan.

Sumala ni Salcedo nga gimugna na ang technical working group (TWG) aron maoy motuon sa problema sa   trapiko dili lang ang implementasyon sa truck ban apan lakip na ang higpit nga implementasyon sa illegal parking tungod nakapiot usab sa dagan sa trapiko hinungdang iyang gisugyot nga mapatas-an ang multa sa illegal parkings.

Siya midugang nga ang TWG gilangkuban sa Roads and Traffic Administration RTA nga maoy chairman kauban sa iyang mga miembro  nga gilangkoban sa City Administrators Office, Office of the Building Official, City Engineering Office, City Planning and Development Office, Filipino-Chinese community, transport sector ug Liga ng mga Barangay.

Niini, malaumon si Konsehal Salcedo nga pinaagi sa hiniusang rekomendasyon sa TWG dako ang matabang nga mapagaan ang problema sa trapiko sa syudad ug mapatuman sa hingpit ang balaod  alang sa maog katuyoan. (MLR/SP)