Salcedo daling miaksyon sa problema dihas Bolonsiri Cemetery

GIPASABOT ni konsehal Eric Salcedo chairman sa komite sa Environment nga ang walay insaktong komunikasyon tali sa kontraktor og sa kasamtangang nagdumala sa Bolonsiri Cemetery pinaagi sa opisina sa City Local Environment and Natural Resources Office (CLENRO) maoy hinungdan nga nalangan ang pagtaklob sa ubang mga pantyon sa maong sam-ang.

Kini ang gipasabot ni Konsehal Salcedo agig reaksyon sa gipadangat nga special report ni Konsehal Yvy Emano atol sa sesyon niadtong Lunes nga gidumala ni Presiding officer Pro Tempore Konsehal Roger Abaday kabahin sa taho nga  adunay 12 ka pantyon ang wala natakloban gumikan kay gamay lang ang nag-trabaho samtang daghang gahulat nga kaparentihan  nga mapahilona ang ilang kabanay.

Sumala ni Salcedo nga human niya  nadawat ang maong reklamo iyaha gilayon kining gipahibalo sa Department Manager sa CLENRO ug hinungdan nga dali kining aksyonan sa kontraktor ang nasangpit nga problema.

Malaumon ang konsehal nga dili na kini subling mahitabo tungod kay makahatag kini og kaperwisyo sa mga tag-tungod ingon man makaapekto ang baho niini sa panlawas sa katawhan.

Niini, gipasalamatan ni Konsehal Salcedo ang nagpakabanang lungsoranon ingon man si Konsehal Yvy Emano nga maoy nagpadangat sa maong reklamo. (MLR/SP)