Sacala mipresentar sa iyang State of the Youth Address

DAKONG garbo ug mapasalamaton si Konsehal Kenneth John Sacala, City SK Federation President ug chairman sa komite sa youth and sports development sa konseho, sa mga programa, ug proyekto nga nakab-ot sa iyang buhatan ug sa Oro Youth Development Office.

Kini ang unod sa  mensahe  ni Sacala atol sa iyang State of the Youth Address nga gipahigayon niadtong September 1 ning tuig diha sa hawanan sa City Hall nga gitambongan sa mga opisyal sa syudad, SK officials, SK leaders, ug SK partner agencies.

Lakip sa gilakbitan sa konsehal ang mga kalihukan nga nakab-ot alang sa kabatan-onan labina sa out of school youth, sangguniang kabataan leadership and development, ug oro youth advocacy initiatives and involvement.

Gipahibalo usab sa konsehal ang mga plano sa City SK Federation, Oro Youth Development Council, ug Oro Youth Development Office.

Sa maong higayon, gipasalamatan sa konsehal ang mga paningkamot ug inisyatibo  ubos sa Sangguniang Kabataan Empowerment Program uban sa giya sa OYDO, Department of the Interior and Local Government (DILG) ug National Youth Commission-Region 10.

Labaw niini, hugot nga gipasalamatan ni Konsehal Sacala si Mayor Klarex Uy sa iyang pagsuporta sa mga programa sa kabatan-onan   kauban ang konseho sa dakbayan  ubos ni Bise Mayor Bebot Rodriguez. 

“Malipayon akong  isulti  kaninyong tanan, nga dili man perpekto ang panag uban sa mga SK officials apan wala nahimong babag ang hisgutanang politika sa among pagsugod sa paglingkod tungod tagsa tagsa  naningkamot nga ang kabatan-onan sa matag barangay adunay mga programa ug kalihokan nga mapahimuslan sa kabatan-onan,” pamahayag ni Konsehal Sacala. (JRG/SP/Photos by CJ Dalipe-Page)