Rural Brgys. sa syudad nag-implementar na sa ilang waste segregation

NAG-IMPLMENTAR na ang mga rural barangays sa syudad gikan sa Barangay No. 1 ngadto sa 40 sa waste segregation sa ilang mga basura.

Kini ang gipahibalo sa taga City Local Environment and Natural Resources (CLENRO) atol sa tigom sa komite sa environment and natural resources niadtong miaging Biernes nga gidumala ni Konsehal Eric Salcedo samtang gihisgutan ang isyo sa basura.

Mahinumduman nga si Konsehal Roger Abaday sa milabayng sesyon unang mihangyo sa kabarangayan nga motabang sa pagpangolekta sa basura diha sa ilang tagsa tagsa kadapit.

Gipasabot ni Salcedo nga kinahanglan nga mokoordinar ang CLENRO ngadto sa Association of Barangay Council (ABC) ubos ni Konsehal Yan Lam Lim aron mahisgutan ug ilang mapaabot sa kabarangayan ang ilang mga lakang alang sa hamugaway nga koleksyon sa basura aron makatabang usab ang barangay.

Nasayran nga maoy gihimong pilot sa pagpatuman sa waste segregation ang 40 ka rural barangays sa syudad.

Gikinahanglan gayud ang pagtinabangay sa tanan aron makabaton sa limpyo nga kumunidad, pamahayag ni Konsehal Salcedo.