top of page

RPT remittance sa kabarangayan gihingusgan ni Kon. Salcedo

KUSGANONG gihangyo ni Konsehal Enrico Salcedo, chairman sa komite sa Environment, nga mahisgotan kung unsa ka tinuod nga walay Real Property Tax (RPT) remittance ang dakbayan ngadto sa mga barangay ning syudad.

Kini ang unod sa special report ni Konsehal Salcedo sa sesyon sa konseho niadtong Lunes nga gidumala ni Bise Mayor Kikang Uy human nakadawat ang konsehal og reklamo sa pipila ka kapitanes sa syudad nga adunay pipila ka bulan nga walay RPT remittance.

Matod sa konsehal nga basi sa Local Code of 1991 o’ RA 7160 Article VI, Chapter VII, kun Disposition of Proceeds, tataw kaayo nga adunay share ang mga barangay gikan sa RPT.

Dugang pagpasabot sa konsehal nga ang gisaligan sa matag barangay mao ang Internal Revenue Allotment (IRA), ang share sa RPT, ang 50% share sa Community Tax ug uban pang kita diha sa tagsa-tagsa ka barangay diin maoy gikuhaan sa ilang mga sweldo ug uban pang mga balayronon sa barangay.

Maayo naman lang unta nga maremit na kini ngadto kanila labina kay pandemic karon ug anaa ang syudad sa Alert Level 3 dala sa COVID-19 virus.

Pipila kanato sa konseho miagi isip usa ka opisyal sa barangay ug nakabalo unsa ka mahinungdanon kaayo ang maong remittance, dugang pamahayag ni konsehal Salcedo.

Niini, giduso ni Bise Mayor Uy ang maong special report ni Konsehal Salcedo ngadto sa komite sa Barangay Affairs ni Konsehal Yan Lam Lim ug sa komite sa panalapi ni Konsehal Edna Dahino alang sa tukmang aksyon ug rekomendasyon.


bottom of page