Rekomendasyon sa NEDA kinahanglan nang aksyonan –Konsehal Salcedo

GISUGYOT ni Konsehal Eric Salcedo, chairman sa komite sa Environment and Natural Resources nga aksyonan ang rekomendasyon sa National Economic Development Authority (NEDA) nga nagkinahanglan og augmentation sa pundo ang panginahanglanon sa City Social Welfare and Development (CSWD) ug City Health Office (CHO).

Kini ang reaksyon sa konsehal sa special report ni Konsehal Roger Abaday sa sesyon sa konseho niadtong Lunes nga gidumala ni Bise Mayor Kikang Uy mahitungod sa giluwatang banabana sa planning agency sa sekretaryo sa maong ahensya nga diin nagsaysay sa mga sangpotanan sa pagpahigayon sa ECQ sa usa ka lugar.

Gipasabot ni Konsehal Salcedo nga mao ning panahon karon nga moaksyon na ang chairman sa komite sa finance aron matumbok ug marekomendar ngadto sa Mayor kon unsa may angayan nga buhaton alang niiini.

Malaumon si Konsehal Salcedo nga pinaagi niini matubag ang mga panginahanglanon sa maong mga buhatan labina niining panahon sa pandemya nga gikinahanglang maserbisyohan ang katawhan.