Rekomendasyon nga putlon ang kontrata tali sa syudad, Jomara giaprobahan sa Konseho

MAYORIYANG giuyonan sa konseho sa syudad atol sa sesyon niadtong Lunes nga gidumala ni Bise Mayor Bebot Rodriguez ang resolusyon nga nag suporta sa rekomendasyon sa clenro alang sa pagputol sa kontrata tali kagamhanang lokal sa dakbayan ug Jomara Construction, Inc alang sa pagdumala sa sanitary landfill diha sa Barangay Pagalungan ning syudad.

Kini human nagpadangat sa iyang special report si Konsehal Eric Salcedo, chairman sa komite sa environment, kalabot sa maong isyu human niya nasuta nga nagpabilin ang problema sa pagkolekta sa basura sa mkabarangayan tungod kay maglisod ang mga garbage truck paglabay sa basura gumikan sa kaguba sa dalan sa dumpsite sa maong barangay.

Siya midugang nga kinahanglan nga putlon na ang maong kontrata tungod kay dugay na nga panahon nga nagpasagad ang nagdumala sa landfill.

Ang resolusyon nga gipalabang sa konseho alang sa nasangpit nga katuyoan gipangamahanan sa komite sa environment ni Konsehal Eric Salcedo ug sa komite sa pamalaod ug reglamento ni Konsehal Edgar Cabanlas. (MLR/SP)