Reklamo sa taga-Zone 10 Calaanan tukion sa komite sa public utilities

SI Konsehal Suzette Magtajas-Daba, chairman sa komite sa edukasyon, kusganong mihangyo sa konseho nga mahatagan og aksyon sa Cagayan de Oro Water District (COWD) ang problema sa suplay sa tubig sa pipila ka mga konsumedor sa syudad.

Ang maong hangyo gihimo sa konsehal atol sa sesyon sa Konseho niadtong Lunes nga gidumala ni Presiding Officer Protempore Konsehal Romeo Calizo, human siya nakadawat og sulat reklamo sa mga lomolopyo sa Zone 10 Calaanan Relocation Site Canitoan kabahin sa ilang kasinatian sa kahugaw, baho, taya, lubog ug usahay naay lapok ang mogawas nga tubig sa ilang mga gripo nga gisuplay sa COWD.

Matod ni Daba nga nabalaka na ang mga residente kay dili na gayud luwas imnon ang ilang suplay sa tubig ilabina sa mga bata ug sa mga hamtong nga adunay hinay nga iresistensya sa panglawas.

Ang maong taho giduso ni Presiding Officer Pro Tempore Calizo ngadto sa komite sa public utilities alang sa tukmang aksyon ug rekomendasyon. (RNQuiblat/SP)