Regulasyon sa pletihan sa trisikad sa Brgy Puntod aprobado na sa konseho

MAHIMO nang ipatuman sa Barangay Puntod ang ilang ordinansa kabahin sa regulasyon sa pletihan sa mga trisikad sa nasangpit nga dapit.

Kini human ang konseho sa syudad atol sa sesyon niadtong Lunes nga gidumala ni Bise Mayor Bebot Rodriguez hiniusang misagop sa resolusyon nga nag-uli sa ordinansa sa barangay diin nasukip ang ilang mga gabayan ug palisiya  sa gimando  nga pletihan sa mga trisikad.

Lakip niini mao ang paglimitar sa mga pasahero ilabi na sa mga studyante, pagbutang ug garbage bin sa matag  sa trisikad, pag-bawal sa double parking og uban pa nga maghatag kaarangan sa ilang serbisyo ngadto sa katawhan.

Samtang nasukip sa regulasyon sa nasangpit nga pletihan  ang pagsingil  sa P10.00  kon  ang pasahero  musakay gikan sa PP5 station paingon sa riverwall, San roque,Disrtict-5 vice versa, PP5 station paingon sa barangay hall,market-market,Escobido St.Block-3,FCTC og District-7 samtang  adunay P5  nga pletihan alang sa mga senior citizen ug PWDs,  P3.00  alang sa elementary pupil; P5 sa mga studyante sa high school ug P10 alang sa mga mabdos.

Ang maong ordinansa sa Barangay Puntod miagi sa makuting pagtuon sa mga komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyuan gipaluyohan sa komite sa

barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas. (MLRapanot/SP)