top of page

Reforestation project dihas Indahag mapatuman


Dugang lakang pagpreserbar sa kinaiyahan ang mapatuman diha sa Barangay Indahag pinaagi sa pagpananum og kakahuyan sa dapit.


Kini human ang konseho sa syudad sa sesyon kagahapon nga gidumala ni Bise Mayor Bebot Rodriguez mipalabang sa ordinansa nga naghatag og katungod ni Mayor Klarex Uy pagpirma sa Memorandum of Understanding (MoU) tali sa kagamhanan sa syudad ug Xavier University –Ateneo Cagayan nga girepresentahan ni Fr. Mars Tan ug San Isidro Calacapan Indahag Farmers Association –Multi Purpose Cooperative (SICIFA-MPC) nga representahan ni Engr. Vicente Beduya alang sa pagpatuman sa Tree Growing/Reforestation diha sa Sitio Calacapan, Indahag.


Ang maong lakang nunot sa tinguha sa Xavier University pag-promote sa mga lakang pagproteher sa kinaiyahan diin kabahin sa ilang inisyatibo ang Tree Growing/Reforestation Project.


Sa MoU, ang kagamhanan sa dakbayan pinaagi sa City Local Environment and Natural Resources Office (CLENRO) maoy magpaambit sa mga angayang lakang alang sa malahutayong pagdumala ug pagpalambo sa kinaiyahan.


Sa maong kasabutan, ang SICIFA-MPC mosuporta sa paningkamot sa pagrehabilitar, pagpreserba ug pagproteher sa Cagayan de Oro Watershed. Ubos sa programa, pipila sa mga tinun-an sa Xavier University mopahigayon sa ilang National Service Training Program (NSTP) sa dapit pinaagi sa pagpananum og mga kahoy.


Ang ordinansa nga gipalabang sa konseho alang sa maong katuyuan gipaluyuhan sa komite sa environment ni Konsehal Roger Abaday ug komite sa pamalaod ni Konsehal Ian Mark Nacaya.

コメント


bottom of page