Pundo sa kabatan-onan sa Brgy. Taglimao, giuyonan

PINAAGI sa resolusyon nga gipalabang sa konseho sa dakbayan, hingpit nang mapatuman sa Sangguniang Kabataan (SK) sa Barangay Taglimao ang ilang mga programa ug proyekto alang sa kabatan-onan sa barangay karong tuiga.

Ang maong resolusyon nagtugot sa implementasyon sa SK annual budget nga adunay gibanabanang kinitaan ug galastohon nga nagkantidad og ₱482,067.00.

Sa maong pundo, gihatagan ug prayoridad ang mga programa alang sa youth empowerment ug development, nga kabahin usab sa Maintenance and Other Operating Expenses (MOOE). Sa kinatibuk-ang MOOE nga nagkantidad og ₱361,647.00, naapil ang mga programa alang sa aktibong pagpanginlabot sa komunidad (₱135,000.00), edukasyon (₱75,000.00), panglawas (₱25,000.00) ug pagpanalipod sa kinaiyahan (₱10,000.00).

Lakip usab sa gipundohan sa MOOE ang mga galastohan sa opisyal nga pagbiyahe, training, kuryente, internet subscription, gamit sa opisina, pag-ayo ug pagmentinar sa mga ekipo sa opisina, fidelity bond premium, ug bayad sa annual dues sa SK Federation.

Ang maong resolusyon gipaluyohan sa komite sa sports and youth development ni Konsehal Kenneth John Sacala ug sa komite sa pamalaod ug reglamento ni Konsehal Edgar Cabanlas. (SPEscoltos/SP)