Programa pagproteher sa kinaiyahan mapalapdan

GIPAABOT hatagan og pagtagad sa komite sa Environment and Natural Resources ni Konsehal Eric Salcedo ang sugyot nga Memorandum of Understanding tali sa Xavier University –Ateneo De Cagayan pinaagi sa Mc Keough Marine Center (XU-MMC), kagamhanan sa syudad ug Sari Sari Fishermen Association.

Ang maong kasabutan naglangkob sa pagdumala sa mangrove area diha sa Barangay Bonbon nga gitumong pagproteher sa kadagatan.

Gipasabot nga ang mangrove forest naghatag og halapad nga ecosystem services sama sa pagprotektar sa kadagatan, pagmintinar sa biodiversity, medicinal provision ug climate regulation.

Sa tinguha nga mapadayon ang Mangrove Mapping Project diha sa Macajalar Bay nga gisugdan niadtong tuig 2018, ang Forest Foundation Philippines uban sa XU-MMC mitanyag sa proyekto nga gilantawng mopalig-on sa kapasidad sa kapunungan diha sa pagrehabilitar sa bakhawan sa maong dapit.

Dako ang paglaum ni Salcedo nga ang maong kasabutan magpalapad sa kampanya sa dakbayan dinha sa pagproteher sa kinaiyahan.