Problema sa internet connection sa Gran Europa giaksyonan sa komite sa Public U

NANGUSOG ang komite sa public utilities  sa Konseho ubos ni Konsehal Romeo Calizo nga matabangan maresolbar ang  problema sa kahinay sa internet connection sa  Lumina, Gran Europa sa Lumbia ning syudad.

Kini human si Konsehal Bernie Esparcia sa tigom   niadtong Martes midala  sa  reklamo ni  Nathalie Ubanez, usa sa homeowner sa maong subdivision, sa ilang reklamo  kalabot sa seryosong problema sa ilang internet connection  nga giingong wala hatagi og igong pagtagad sa kasamtangang  internet provider.

Sumala pa nga  naapektohan ang panginabuhian, negosyo ingon man ang access sa mga estudyante sa edukasyon tungod sa problema  sa koneksyon.

Matod ni Esparcia  mao usab kini ang problema sa ubang HOA  nga dili gapasulod ang subdivision og laing  internet provider  hinungdan nga kon adunay problema sa koneksyon wala gayud kapaingnan ang mga homeowners.

Hinoon matod ni Esparcia nga segun sa director sa National Telecommunication Commission  (NTC) nga  adunay balaod niini nga  gidili  ang exclusivity hinungdan nga boot kining sutaon sa komite.

Niini, gidapit ni Konsehal Calizo  ang director sa NTC ug ubang resource persons aron paghatag katin-awan  ug kasolbaran sa maong problema. (JRGalano/SP)