Planta dihas Upper Puerto gipahimo’g lakang mapakgang pag-alisngaw sa baho

Hisgutan sa Komite sa Environment ni Konsehal Roger Abaday sa tigom sa umaabot Biernes, Hunyo 16, 2023 ang rekomendasyon sa City Local Environment and Natural Resources Office (CLENRO) kalabot sa gipahigayong pagsusi didto sa Misamis Oriental Rendering Corporation (MORC) Plant sa Upper Puerto.

Ang buhatan mirekomendar nga ang planta mohimo sa mga lakang aron mapakgang ang pag-alisngaw sa baho human nasuta nga adunay gagawas panagsa nga baho sa loading/receiving area niini. Dugang pa, aduna usay mga container nga giingong gapanimaho ug adunay presensya sa mga langaw.

Hinuon, namatikdan usab nga adunay gihimong paglimpyo sa mga kawani sa planta ug pag-disinfect sa dapit. Ang binulan o’ regular nga pagsusi sa CLENRO ngadto sa planta resulta sa panawagan ni Konsehal Ian Achas nga pagbalik sa alisngaw sa baho gikan sa planta nga nakahatag og peligro sa panglawas sa katawhang nanimuyo sa dapit.

Niini, gidapit sa Komite pagtambong sa tigom ang tagdumala sa planta, kapitan sa Barangay Puerto ug Balubal, regional director sa Department of Health ug uban pang representante sa mga ahensya sa gobyerno.