Plano sa COCPO alang sa kahusay, kalinaw gisuportahan ni Konsehal Goking

SUPORTADO ni Konsehal George Christopher Goking, chairman sa komite sa trade ug commerce, ang plano ni Acting City Director P/Col. Gerardo D. Ulanday sa Cagayan de Oro City Police Office (COCPO) alang sa pagmentinar sa kahusay ug kalinaw sa Dakbayan.

Kini ang gibutyag sa konsehal atol sa sesyon niadtong Martes nga gidumala ni Bise Mayor Bebot Rodriguez ug ang isyu kabahin sa 911 emergency hotline ug ang security and standard holsters sa mga personahe sa Philippine National Police.

Buot ni Konsehal Goking nga balikan og tan-aw ang Closed-Circuit Television (CCTV) ordinance sa syudad tungod sa iyang personal nga kasinatian nga gisudlan sa wala mailhing tawo ang iyang kaugalingong balay ug biktima siya sa panghold-up diha sa may KSY, Barangay Carmen.

Apan subo lang kay walay CCTV camera o kun naa man ugaling, kinahanglan pa magkuha og court order aron iyang mapresentar ngadto sa Carmen Police Station sa iyang pagpablotter sa maong insidente.

Gisugyot usab ni Goking nga matutokan ang saktong pagresponde sa 911 hotline emergency.

Gipasabot sa konsehal nga sa ubang nasud, kon dili makatubag ang mitawag, deretso kini adtoan basi sa lokasyon sa Global Positioning System (GPS).

Gihangyo usab ni Konsehal Goking si Acting City Director P/Col. Ulanday sa pag-ilis o pagbag-o sa mga sub-standard ug depektosong gamit sa  mga police station. (RNQ/SP)