Pipila ka straktura sa billboard nasuta walay building permit- Konsehal Seno


SI Konsehal John Michael Seno, chairman sa komite sa sports and youth development mihangyo sa konseho nga ipatuman gayud ang pagmulta ngadto sa mga naglapas sa National Building Code of the Philippines, Civil Code of the Philippines ug sa mga

ordinansa sa dakbayan sa Cagayan de Oro.

Kini ang hugot nga gipaabot ni konsehal Seno sa tigom sa committee of the whole kagahapon nga gidumala ni konsehal Romeo Calizo nga nagtuki kabahin sa iyang special report sa miaging sesyon sa konseho pagsusi sa mga giingong ilegal nga

giugbokan sa istraktura sa mga billboards dinhi sa syudad.

Gipasabot sa konsehal nga nakapaalarma kaayo ang ubang giugbokan sa billboards kay wala na gyud sa saktong mga lugar nga nakahatag og kakuyaw sa katawhan sa dakbayan.

Matod sa representante sa buhatan sa Building Official nga aduna lamang 7 ka billboards ang naisyuhan og building permit ug gipamatud-an kini sa buhatan sa DPWH Region-10.

Niini, si konsehal Seno kusganong mihangyo sa konseho nga mahatagan kini og igong aksyon labina nga nakuha naman ang mga impormasyon nga adunay nahimong kalapasan ang ubang luna sa gitukoran sa maong mga billboards sa nagkadaiyang dapit

sa syudad.

Gikinahanglan ang tukmang rekomendasyon sa konseho alang sa implementasyon subay sa mga balaodnon sa nasud ug sa dakbayan sa Cagayan de Oro, panapos nga pamahayag ni konsehal Seno.