Pascual bag-ong chairman sa agriculture, fisheries

SI Konsehal Juancho “Antuy” Pascual ang napili isip bag-ong chairman sa komite sa agriculture, fisheries ug aquatic resources hulip sa iyang igsoon nga si kanhi Konsehal Jay Roa Pascual.

Kini human hiniusang gisagop sa konseho ang resolosyon atol sa ilang inaugural session niadtong Lunes nga gidumala ni Bise Mayor Bebot Rodriguez nga  nagpili sa chairman, vice chairman ug mga miyembro sa  komite  subay sa ilang Internal Rules of Procedure kon IRP.

Ang komite maoy magtuon ug mag-imbestiga sa gisugyot nga mga ordinansa o resolusyon nga may kalabutan sa agrikultura, produksyon sa pagkaon ug agri-negosyo, panukiduki sa ekonomiya sa agrikultura, survey ug konserbasyon sa yuta; serbisyo alang sa mga mananap ug pagkuwarentinas sa kahayupan, ingon man ang mga butang nga may kalabotan sa mag-uuma, ang ilang relasyon sa tag-iya sa yuta ug ang programa alang sa repormang agraryo.

Samtang tun-an ug imbestigahan usab niini ang tanan nga mga butang o gisugyot nga mga ordinansa o resolusyon nga may kalabotan sa pangisda ug pagpreserbar sa kahinguhaan sa tubig ug pagpalambo sa mga pangisdaan; ug pagtukod sa mga fish pond, corrals, ug mga regulasyon niini.

Si Konsehal Pascual mipasalamat sa oportunidad ug mipahayag nga iyang ipadayon ang nasugdang mga programa sa komite nga nagtutok sa iyang adbokasiya sa malungtarong agrikultura, modernong suporta sa mga mag-uuma, ug pagpasiugda sa natural nga kaanyag sa siyudad.

Ang iyang kauban sa komite mao sila si Konsehal Desiree Ann Dahino isip vice chairman ug Konsehal Paolo Nicolo Gaane, Moreno Daba, IV ug George Christopher Goking, mga sakop. (RNQ/SP)