Palisiya alang sa pagtugot makasulod mga pets sa malls gisugyot ni Abaday

GITINGUHA ni Konsehal Roger Abaday, chairman sa komite sa public order and safety, nga mahan-ay ang usa ka palisiya aron magama ang ordinansa nga magtugot sa mga pet owners nga makasulod sa mga establisemento sama sa malls uban ang ilang mga binuhing mananap.

Kini ang gipaambit nga panahum ni Konsehal Abaday agig reaksyon sa special report ni Konsehal Yvy Emano atol sa sesyon niadtong Lunes nga gidumala ni Bise Mayor Bebot Rodriguez mahitungod sa paghimo sa mga establisamento sa syudad isip pets-friendly.

Sumala ni Abaday nga subay sa pagtoon sa US Conference of Mayors and Governors League, 56% sa mga magpapatigayon sa America ang pabor nga makasulod ang mga pets sa mga establisemento tungod kay makaayo kini sa ilang komunidad.

Siya midugang nga ang Bonifacio Global City sa kaulohan naila nga pet district ingon man ang malls sa Robinson, Ayala, ug SM adunay mga dapit alang sa mga pet lovers.

Niini, suportado ni Abaday ang maong tinguha ni Konsehal Emano ug gisugyot niini nga mahan-ay ang ordinansa alang sa maong katuyuan. (MLR/SP)