Pagtukod sa child development center gipundohan sa Tignapoloan

GIHATAGAN sa Konseho sa Barangay Tignapoloan og igong pagtagad sa kaugmaon sa ilang mga kabataan.

Kini human sa sesyon sa konseho sa syudad niadtong Lunes nga gidumala ni Presiding Officer Pro-Tempore Konsehal Roger Abaday misagop sa resolusyon nga nag-uli sa ordinansa sa Tignapoloan kalabot sa ilang 2026 Annual budget nga mobalor og P10,846,499.00 alang sa hingpit nga implementasyon.

Gihatagan og prayoridad sa barangay nga mapatuman sa tuig 2026 ang mga proyekto ug programang gipundohan ubos sa 20% Development Fund nga naglakip sa pagtukod sa child development center sa Sitio Bankers, pagrehabilitar sa multi-purpose hall ug multipurpose stage sa Upper Tignapoloan ug sistema sa panubig.

Lakip sa gipundohan sa barangay ang pagtunol og benepisyo sa mga kawani niini, maintenance expenses nga naglakip sa training, gamit sa opisina, programa sa GAD, nutrisyon, sa panglawas, ug uban pang operating expenses.

Gigahin usab ang igong pundo alang pagpatuman sa mga lakang pagtubag sa panginahanglan sa katawhan panahon sa kalamidad, pagpamalit og mga kahimanan sa kalamidad, programa alang sa kabatan-onan ug uban pang mga programa nga gilantawng maghatag og dugang kaarangan sa kinabuhi sa katawhan sa dapit.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ni Konsehal Edgar Cabanlas. (RNQ/SP)