Pagtukod sa CDO Memorial Park sa Distrito 1 gisuportahan sa Konseho

GILANTAW  nga matukod dili madugay diha sa Barangay Baikingon ang Cagayan de Oro Memorial Park sa Distrito 1.

Kini  human ang Konseho sa sesyon kagahapon nga gidumala ni Bise Mayor Bebot Rodriguez misagop sa resolusyon nga naghatag katungod ni Mayor Rolando Uy  sa pag-apply  alang sa Gratuitous Special Land Use Permit sa Department of Environment and Natural Resources (DENR) Regional Office 10.

Nasayran nga maoy buot aplayan sa kagamhanan og permit ang  parcela sa lote  nga porsyon sa Lot No.100449, Cad 237 nga adunay gilapdon nga dili mominus 28,796  metros kwadrados aron himoong public city cemetery.

Gilauman nga kini maghatag kasayon sa mga Kagay-anon  nga nanimuyo sa unang  distrito sa pagpalubong sa ilang mga minahal sa kinabuhi nga motaliwan.

Ang resolusyon  nga gipalabang sa Konseho alang sa maong katuyuan gipaluyohan sa komite sa subdivision and landed estate  ug komite sa pamalaod ug reglamento ubos ni Konsehal Edgar Cabanlas. (JRGalano/SP)