Pagtukod og drainage, pag-instalar og mga suga gipundohan sa Tagpangi

GILANTAW sa Konseho sa Barangay Tagpangi nga mapanalipdan ang katawhan sa pagbaha ug paghatag dugang kahayag sa kadalanan panahon sa gabii.

Kini human ang konseho sa syudad misagop sa resolusyon nga nag-uli sa ordinansa sa Tagpangi diin nasukip ang ilang 2026 Annual budget nga mobalor og P7,300,482.00 alang sa hingpit nga implementasyon.

Gihatagan og prayoridad sa barangay nga mapatuman sa tuig 2026 ang mga proyekto ug programang gipundohan ubos sa 20% Development Fund nga naglakip sa pagtukod sa Phase 2 drainage system diha sa Zone 1 paingon Zone 2 ug pag-instalar sa mga suga sa kadalanan nga mobalor og P1,207, 097.00.

Lakip sa gipundohan sa barangay ang pagtunol og benepisyo sa mga kawani niini, maintenance expenses nga naglakip sa training, gamit sa opisina, programa sa gender and development, nutrisyon, panglawas, ug uban pang operating expenses.

Gigahin usab ang igong pundo alang sa pagpatuman sa mga lakang pagtubag sa panginahanglan sa katawhan panahon sa kalamidad, pagpamalit og mga kahimanan sa kalamidad, programa alang sa kabatan-onan, paugnat sa kusog ug uban pa nga  makaaghat sa katawhan nga makiglambigit sa mga kalihokan sa barangay.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ni Konsehal Edgar Cabanlas. (RNQ/SP)