Pagsuta sa mga timbangan sulod sa merkado publiko hingusgan ni Goking

“Ang paghatag og tinuoray nga serbisyo ang akong ibugti kaninyong lomolopyo dinhi sa Barangay Tumpagon.”

Kini ang mensahe ni Konsehal George Christopher Goking atol sa gipahigayong Klarex nga Serbisyo sa Barangay (KSB) sa maong dapit.

Ang sinemanang kalihokan sa kagamhanan sa dakbayan sa pagpanguna ni Mayor Klarex Uy nagdala sa nagkadaiyang batakang serbisyo aron mapahimuslan sa katawhan sa kabarangayan.

Gipasabot ni Goking nga dako ang responsibilidad nga gisangon kaniya isip chairman sa komite sa komite sa trade and commerce diin tipik sa tahas niini mao ang pagtuon, pag-imbestigar ug pagtaho sa mga butang nga may kalabotan sa pamatigayon, pagplano ug programa alang sa ekonomiya.

Alayon niini, gipasalig sa konsehal ang pagtamod sa maong mga tahas ug usa niini mao ang pag-inspeksyon sa mga timbangan sulod sa kamerkadohan sa syudad. (RNQ/SP)