Pagsusi sa mga balaod, regulasyon sa analog ug digital weighing scale gihingusgan ni Goking

GIHINGUSGAN ni Konsehal George Christopher Goking, chairman sa komite sa trade og commerce, nga tan-awon pag-usab ang mga balaod ug regulasyon bahin sa paggamit sa digital ug analog nga timbangan sulod sa kamerkadohan sa syudad.

Kini ang unod sa taho ni Goking atol sa sesyon sa Lunes nga gidumala ni Bise Mayor Bebot Rodriguez.

Matod sa konsehal nga sa iyang pagbisita sa  kabarangayan ug sa kamerkadohan sa dakbayan, kasagaran sa mga isyu ang iyang gakadawat mao ang reklamo bahin sa mga timbangan butang nga angay gayud hatagan sa pagtagad pinaagi sa pagpahigayon og imbestigasyon.

Gani, karong bulana, pipila na ka mga tampered weighing scales ang gisakmit sa buhatan sa City Economic Enterprises and Business Development Administration (CEEBDA) diha sa Cogon ug Carmen market.

Niini, gisugyot ni Goking ang pagmugna og technical working group (TWG) sa posibleng pagsusi pag-usab sa kasamtangang nasyonal ug lokal nga mga balaod bahin sa paggamit sa analog ug digital weighing scale.

Ang TWG pagalangkuban sa COCPO, CEEBDA, DTI, DILG, City Finance, ORO TIPC, CDO CPCC, RTA, mga representante sa kada Barangay alang sa representasyon sa Talipapa Market ug mobile o’ transient vendors ug uban pa.

Ang maong taho giduso ni Bise Mayor Bebot Rodriguez ngadto sa komite sa trade og commerce ubos ni Konsehal George Goking, komite sa consumer protection ni Konsehal Jonjon Rodriguez ug sa komite sa economic enterprises ni Konsehal Edgar Cabanlas alang sa tukmang pagtoon ug aksyon. (RNQ/SP)