Pagsumite sa listahan sa iskolars nga giingong wala makadawat sa allowance, gisugyot ni Konsehal Daba

GISUGYOT ni Konsehal Suzette Daba, Chairman sa Komite sa Edukasyon sa konseho, nga masumite ang listahan sa mga skolars nga giingong wala pa makadawat sa ilang allowances.

Kini ang reaksyon sa konsehal sa special report ni Konsehal Imee Moreno sa sesyon sa konseho niadtong Lunes nga gidumala ni Bise Mayor Bebot Rodriguez mahitungod sa lima (5) ka estudyante  nga midangop kaniya ug  mireklamo  nga  wala pa nila madawat ang ilang allowance.

Si Konsehal Daba mibutyag  nga  na-release  na ang allowance sa mga iskolars alang sa bulan sa  Enero ngadto sa Marso gawas lamang sa 400 ka iskolars nga wala nagpasa sa ilang grado sa gitakdang panahon.

Hinuon iyang giklaro nga adunay mga iskolars nga dili na mahimong makadawat sa allowance labina kadtong  natangtang na pagka-iskolar tungod kay nabagsak sa makaduha ka higayon.

Niini, gihangyo ni Konsehal Daba si Konsehal Moreno sa pagduso sa lista sa mga pangalan sa  maong mga iskolars aron masuta ang ilang sitwasyon.