Pagsemento sa dalan, drainages sa Bulua gisuportahan sa Konseho

Hingpit nang mapatuman sa Barangay Bulua ning syudad ang ilang mga programa ug proyekto karong tuiga.

Kini human ang konseho sa sesyon niadtong Lunes nga gidumala ni Bise Mayor Jocelyn Rodriguez mipasaka og resolusyon nga nag-uli sa ordinansa sa maong barangay nga may kalabutan sa ilang Annual Budget nga mokabat sa 39,283,877.00.

Lakip sa ilang priority projects ang pagtul-id sa drainage diha sa Willy LLamis Area- Zone 2 Tabok ug Lower Zone5 ingon man pagkompleto sa SC Multi Purpose Bldg. sa Terry Hills Subdivision.

Migahin usab ang barangay og igong pundo alang sa pagsemento sa Zone 1 Dreamland, Gokingville area sa Zone 9, Caayao area sa Lower Zone 4, Lina Villanueva area sa Zone 1 ug Zone 10 Impantao.

Ang ordinansa nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ug reglamento ubos ni Konsehal Edgar Cabanlas.