Pagrehabilitar sa multipurpose hall gipundohan sa Bulua

BALOR sa P3.5 milyones ang gialokar sa konseho sa Barangay Bulua alang sa pagrehabilitar sa ilang multipurpose barangay session hall.

Sa ilang regular sesyon niadtong Lunes nga gidumala ni Bise Mayor Bebot Rodriguez, ang Konseho sa SYUDAD hiniusang misagop sa resolusyon nga nag-uli sa ordinansa sa maong barangay nga may kalabotan sa ilang 2026 Annual Budget nga adunay bana-banang kinitaan ug galastohon  nga mokabat sa P54,626,269,00 alang sa hingpit nga implementasyon.

Gihatagan og prayoridad sa barangay nga mapatuman ning tuig  ang mga proyekto ug programang gipundohan ubos sa 20% Development Fund nga naglakip sa pagrehabilitar sa multipurpose barangay hall, rehabilitasyon sa retaining wall sa BUCAUPNAI ug sa health center, Day Care Center sa Zone 6 ug sa guard house ug  pagtukod sa drainage diha sa Upper Zone 8 ug Zone 9 ug sa perimeter fence sa Lower Zone 3.

Gigahin usab ang igong pundo alang pagpatuman sa mga lakang pagtubag sa panginahanglan sa katawhan panahon sa kalamidad, pagpalit og mga kahimanan nga magamit kon adunay kalamidad, programa alang sa kabatan-onan ug uban pang mga programa nga gilantawng maghatag og dugang kaarangan sa kinabuhi sa katawhan sa dapit.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ni Konsehal Edgar Cabanlas. (RNQ/SP/Photo by Barangay Council of Bulua FB page)