Pagplastar sa overpass diha sa Masterson gihingusgan

GILANTAW nga masibog ug maplastar ang kamulong  gitukod nga overpass diha sa Masterson Avenue, Upper Carmen, ning syudad.

Kini human si Konsehal Al Legaspi Jr., chairman sa Komite sa Public Works, atol  programang Ang Konseho  sa usa sa mga sibyahan sa radio ning syudad mibutyag nga padayong gipaningkamotan nga makuha ang panugot sa Cagayan de Oro Power and Light Company (CEPALCO) nga didto isibog sa ilang luna ang poste sa maong overpass.

Mahinumdoman nga atol  milabayng tigom sa komite nga gitambongan sa taga-Deparment of Public Works and Highways-Region 10, didto nakita ang problema tungod kay ang poste sa maong overpass didto gitukod sa second lane sa maong dalan hinungdan nga  delikado kaayo alang sa mga motorista ug mahimong pelegro kini sa aksidente labina panahon sa gabii.

Sumala sa konsehal nga gihulat nalang ang opisyal  nga panugot gikan sa maong kompanya aron nga mapahiluna na gilayon ang poste sa maong overpass. (JRG/SP)