Pagpanas sa tipping fees sa garbage collection sa mga subd gisugyot

SI Bise Mayor Jocelyn Rodriguez padayong nanginguha nga mapalapdan pa ang kolaborasyon sa lokal nga kagamhanan ug pribadong mga establisamento ug mga kapunungan dinha sa pagproteher sa kinaiyahan.

Kini ang tumong sa bise mayor sa pagpasaka sa sugyot ordinansa nga magpanas sa Section 27 sa Ordinance No. 13378-2018 kon Integrated Ecological Solid Waste Management of Cagayan de Oro City.

Ang maong lakang nunot sa mga reklamo nga nadawat sa miaging konseho gikan sa lain laing homeowners associations kalabot sa pag-imposar sa syudad og tipping fees taliwala nga sila mismo ang nagkolekta sa ilang mga basura nga walay gasto ang kagamhanan.

Gipasabot sa bise mayor nga dili angayang singlan sa tipping fees ang mga subdivisions, private entities ingon man mga buhatan sa gobyerno nga maoy nangunay pagkolekta sa ilang mga basura ug naghatod ngadto sa landfill didto sa Pagalungan.

Dako ang akong paglaum nga pinaagi sa maong kausaban mapalapdan pa ang panagtambayayong sa kagamhanan sa dakbayan ug sa mga komunidad dinha sa pagpatuman sa mga programa alang sa kinaiyahan, pamahayag ni Bise Mayor Bebot Rodriguez.

Ang maong sugyot ordinansa sa bise mayor gipaabot tun-an sa komite sa environment ni Konsehal Roger Abaday. (SP/JRGalano)