Pagpalit og multi-purpose vehicle gipundohan sa Barangay Bulua

GILANTAW sa Konseho sa Barangay Bulua ang paghatag og dinaliang aksyon, labi na ang transportasyon sa mga tawo nga nanginahanglan sa emerhensyang serbisyo.

Kini human ang Konseho sa Syudad sa sesyon niadtong Miyerkules nga gidumala ni Bise Mayor Rodriguez misagop sa resolusyon nga nag-uli sa ordinansa  sa barangay diin nasukip ang ilang Supplemental Budget (SB) No. 1 nga mobalor og P2.5 milyones aron mapatuman karong tuiga subay sa rekomendasyon sa City Budget Ofice.

Ang maong pundo gamiton alang sa pagpalit og multi-purpose vehicle/ambulance nga magamit panahon sa emerhensya.

Ang resolusyon nga gipalabang sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug sa komite sa pamalaod ug reglamento ni Konsehal Edgar Cabanlas. (RNQ/SP)