Pagpalig-on sa seguridad sa eskwelahan usa ka shared responsibility -Goking

SUPORTADO ni Konsehal George Christopher Goking, chairman sa komite sa trade and commerce, ang taho ni Konsehal Jonjon Rodriguez kabahin sa gisugyot nga ordinansa nga nagtumong sa pagpakgang, pagsulbad, ug pagpakunhod sa school-based violence sa syudad pinaagi sa komprehensibo nga programa alang sa pagpugong, pagpanalipod, ug interbensyon nga mga lakang.

Matod sa konsehal nga ang bag-ohay lang nahitabo nga school-based violence nakahatag og dakong kabalaka sa komunidad busa importante nga mohimo og og lakang sa pagpalig-on sa kolaborasyon tali sa mga ahensya sa gobyerno, mga institusyon sa edukasyon, mga ginikanan, mga kabatan-onan ug sa tibook komunidad.

Ang kaluwasan sa atong mga estudyante, magtutudlo, ug mga komunidad sa eskwelahan kinahanglan kanunay nga hatagan sa prayoridad, matod sa konsehal.

Samtang gipanday pa ang maong sugyot ordinansa, si Konsehal Goking nanawagan alang sa pagpatuman sa mas lig-on nga mga lakang sa seguridad sa eskwelahan, regular nga mga drills sa pagpangandam sa emerhensya, dugang suporta sa kahimsog sa pangisip, ug mga programa batok sa bullying, uban sa koordinasyon sa Department of Education, Philippine National Police, Bureau of Fire Protection, mga barangay, school administrators, ug uban pang stakeholders.

Ang paghimo og luwas nga mga eskwelahan nanginahanglan, labaw pa sa mga palisiya og aktibo nga partisipasyon sa matag miyembro sa komunidad.

“Magtinabangay kita aron masiguro nga ang atong mga eskwelahan magpabilin nga lugar sa paglaom, pagkat-on, ug oportunidad alang sa matag tinun-an sa dakbayan,” sumpay ni Goking. (RNQ/SP)