Pagpalambo, pagpanalipod sa kinaiyahan hingusgan ni Konsehal Salcedo

NAILHAN si Konsehal Eric Salcedo sa iyang lig-on nga lehislatibong adbokasiya sa pagpalambo ug pagpanalipod sa kinaiyahan, kaluwasan sa publiko ug pagtunol sa episyente nga serbisyo ngadto sa katawhan sa dakbayan sa Cagayan de Oro.

Atol sa inaugural session sa konseho niadtong Lunes nga gidumala ni Bise Mayor Rodriguez gitudlo si Salcedo isip bag-ong chairperson sa komite sa environment.

Ang maong komite gitahasang sa pagtuki ug pagtuon sa mga butang nga may kalabotan sa sanitasyon, ekolohiya ug natural nga kahinguhaan; pagpanalipod sa kinaiyahan, eksplorasyon, pagpalambo, ug paggamit ug pagkonserba sa natural resources.

Lakip usab sa tahas niini ang paghatag programa kabahin sa pagkonserba sa mga tanom ug mananap; ug ang pagpreserba, pagpanalipod, ug pagpalambo sa mga sistema sa suba sa siyudad ug Macajalar Bay.

Gitudlo isip vice chairperson sa Komite si Konsehal Yan Lam Lim samtang ang mga sakop niini mao sila si Konsehal Gilda Go, Paolo Nicolo Gaane ug Al P. Legaspi, Sr. (RNQ/SP)