Pagmugna sa express lane dihas Macabalan port padayong gitun-an -Goking

Magpadayon sa pagtuon ang komite sa trade and commerce ubos ni  Konsehal George Christopher Goking bahin sa sugyot pagmugna sa express lane system diha sa Macabalan Port, ning syudad.

Sa miaging tigom sa komite, ang representante sa Philippine Ports Authority (PPA) mibutyag nga hingpit nga gisunod ang palisiya nga “First Come First Served” basis aron makab-ot ang kahapsay sa pagdumala sa maong pantalan apan kanunay nga gihatagan sa prayoridad ang pagpagawas sa tanang mga palaliton.

Mahinumdoman nga kini ang unod sa taho sa konsehal atol sa sesyon sa konseho kay kini ang nakita sa konsehal nga malungtarong solosyon aron sa pagpakgang sa umaabot nga kanihit sa suplay sa bugas, pagpanalipod sa mga konsumidor ug seguridad sa pagkaon sa dakbayan.

Niini gitahasan sa komite ang buhatan sa PPA uban sa buhatan sa Oro Port  nga magsumite sa kopya sa ilang mga palisiya aron maoy basihan sa pagapandayon nga ordinansa.

Ang maong tigom gitambongan usab ni Konsehal Aga Suan, minority floor leader, nga kusganong misuporta sa maong lakang.  (RNQ/SP)