Pagmugna sa CDONHS-SHS giduso sa konseho

GILANTAW nga matunol ang mas de kalidad nga edukasyon ngadto sa kabataan sa dakbayan.

Kini human ang konseho sa sesyon sa Lunes nga gidumala ni Presiding Officer Pretemporal Konsehal Romeo V. Calizo hiniusang miuyon ug miduso ngadto sa Department of Education (DepEd) sa planong pagtukod sa Cagayan de Oro National High School-Senior High School (CDONHS-SHS) isip bulag ug lahi nga tunghaan sa senior high diha sa Barangay Nazareth.

Si Konsehal Suzette Magtajas-Daba, chairman sa komite sa edukasyon, kinsa nagpaluyo sa gisagop nga resolusyon, mipasabot nga sa pagpatuman sa K-12 curriculum, adunay dakong pagsaka sa panginahanglan sa mga programa sa senior high school.

Kini ang nakapa-aghat sa pagtukod sa CDONHS-SHS isip usa ka stand-alone nga institusyon aron mas maka-focus sa paghatag og de kalidad nga mga programa, pagpalig-on sa mga pasilidad ug aron matubag ang mga panginahanglanon sa edukasyon sa mga estudyante gikan sa nagkalain-laing barangay.

Ang maong resolusyon gipaluyohan usab sa komite sa pamalaod ug reglamento ni Konsehal Edgar Cabanlas. (RNQuiblat/SP)