Pagmugna og Barangay Public Employment Service Desk sa Brgy Nazareth giuyonan sa Konseho

GIHINGUSGAN sa Barangay Nazareth, ning syudad ang pagmugna og Barangay Public Employment Desk aron positibong matubag ang mga isyu kabahin sa panarbaho ug mahatagan sa makahuluganon nga mga program ang mga mamumuo sa ilang barangay.

Sa ilang Konseho sa Lunes nga gidumala ni Bise Mayor Bebot Rodriguez, ang Konseho misagop sa resolusyon nga nag-uli sa ilang ordinansa nga nagtukod sa Barangay Public Employment Service Desk ug nagmugna sa posisyon sa Barangay Employment Service Desk Officer.

Kini ang nakit-an sa maong barangay nga usa sa mga pamaagi aron makatabang sa pagsiguro sa pagpanarbaho ug pagpataas sa kahimtang sa ekonomiya dili lamang sa mga tawo nga walay trabaho kondili paghatag ug kita sa siyudad ug dugang kalamboan.

Tumong usab sa maong ordinansa ang pagbaton sa data nga kinahanglanon sa mga serbisyo sa Department of Labor and Employment (DOLE) ug makigtambayayong sa Public Employment Service Office (PESO) sa dakbayan sa pagpatuman sa lain-laing programa ug proyekto sa pagpanarbaho  ug uban pang ahensya sa gobyerno.Ang maong lakang miagi sa makuting pagtuon sa mga hintungdang buhatan sa City Hall.Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas. (RNQuiblat/SP)