Pagmugna’g YDRVT sa Indahag, konsiderahon sa komite sa barangay affairs

KONSIDERAHON sa komite sa barangay sa Konseho ubos ni Konsehal Marlo Tabac ang ordinansa sa Barangay Indahag ning dakbayan nga magmugna sa ilang   Youth Disaster Response and Preparedness Volunteer Team (YDRVT).

Ang maong ordinansa alayon sa Akta Republika No. 7160 kon “The Philippine Disaster Risk Reduction and Management Act of 2010” nga nagmando sa  tanang lokal nga kagamhanan  lakip na ang barangay sa pag-organisar, pagbansay ug direktang pagdumala sa ilang kaulingong Barangay Risk Reduction and Management Committees.

Gipasabot sa barangay nga ang partisipasyon sa kabatan-onan sa mga pagpangandam sa kalamidad ug pagresponde diha sa barangay level magpalig-on sa komunidad, magpromote sa boluntaryo ingon man mopauswag sa kapasidad sa Barangay Disaster Risk Reduction and Management Committee.

Tipik sa mga tahas sa maong team ang pagtabang sa sayong pagpasidaan, pagbakwit ug pagkontrolar sa panon sa katawhan panahon sa kalamidad, pagsuporta sa rescue ug relief operation ug mohatag og sukaranan  sa first aid ingon man psychological first aid.

Dugtong niini, sila usab ang mopahigayon sa halapad nga pagpahibalo, orientasyon ingon man mga pagbansay kalabot sa pagpapangadam sa katalagman, pagtabang nga mahimong han-ay ang evacuatation centers ingon man sa pagpang-apod apod sa hinabang ug maoy koordinar sa mga tunghaan, youth organizations ug NGOs sa mga ipahigayong kalihukan nga may kalabutan sa DRRM. (JRG/SP)