Paglambo sa mga MSME gihingusgan ni Goking
HUGOT nga gipadayag ni Konsehal George Christopher Goking, chairman sa komite sa trade and commerce, ang iyang suporta alang sa padayon nga paglambo sa mga Micro, Small, and Medium Enterprises (MSMEs) atol sa gipahigayong Financing Forum 2026 dinhi sa dakbayan niadtong Nobyembre 13, 2026.
Ang maong panagtapok gipangunahan sa Oro Trade and Investment Promotions Center (ORO-TIPC) nga adunay temang "Expanding Financial Access for MSME Growth and Resilience" nga gihimo sulod sa City Tourism Hall.
Tumong sa maong forum nga matubag ang mga panginahanglanon sa mga MSMEs ug mga kapunongan sa panginabuhian nga nangita og puhunan ug mga programa sa pinansyal, aron mapadayon ug mapalambo ang ilang mga patigayon, dungan sa pagpangita sa mga bag-ong kahigayonan alang kanila.
Atol sa kalihokan, gihatagan og gibug-aton ni Goking ang dakong papel sa mga MSME sa pagpalig-on sa ekonomiya ug paghatag og trabaho sa katawhan sa siyudad.
Gipasalig usab sa konsehal nga magpadayon ang iyang buhatan sa pagpaluyo sa mga programa nga maghatag og kalamboan sa komunidad sa negosyo.
Gidasig niya ang mga lokal nga negosyante nga pahimuslan ang mga programa sa mga miapil nga institusyon sama sa Small Business Corporation, Land Bank of the Philippines, Development Bank of the Philippines, Bank of the Philippine Islands, Security Bank, ug First Circle.
Mitambong usab sa maong forum ang mga nag-unang ahensya sa gobyerno sama sa Department of Labor and Employment, Department of Social Welfare and Development, Department of Migrant Workers, ug Department of Trade and Industry aron mohatag og giya sa mga negosyante.
Naglaom si Goking nga pinaagi sa mas sayon nga pag-access sa pinansyal nga tabang, mas daghang lokal nga negosyo ang makasugod, makalahutay, ug mas molambo pa sa umaabot nga katuigan. (RNQ/SP)








Comments