Eagle Scout James Barrientos gipahalipayan sa Konseho
GIPAHALIPAYAN sa konseho ubos ni Bise Mayor Bebot Rodriguez si Eagle Scout James B. Barrientos human kini napili isip usa sa Ten Outstanding Boy Scouts (TOBS) of the Philippines alang sa tuig 2026.
Ang tinuig nga pasidungog sa TOBS nagtumong sa pag-ila sa mga batan-ong scout nga nagpakita og talagsaong liderato sa eskwelahan ug komunidad, maayong pamatasan, ug matinud-anong pagserbisyo subay sa Scout Oath and Law.
Nasayran nga si Barrientos, nga nagrepresentar sa Cagayan de Oro Council ug usa ka tinun-an gikan sa Bugo National High School, naghimo og talagsaong kasaysayan isip labing unang scout gikan sa CdeO Council nga nakadawat sa maong prestihiyosong nasudnong pasidungog sa Boy Scouts of the Philippines.
Gipildi ni Barrientos ang ubang finalists gikan sa nagkadaiyang rehiyon sa tibuok nasud human sa hugot nga deliberasyon ug paghukom sa National Selection Committee.
Si Bise Mayor Rodriguez miingon nga ang dedikasyon ni Barrientos nagsilbing inspirasyon dili lamang sa mga batan-ong Kagay-anon kondili sa tibuok kabatan-onan sa nasud aron magpadayon sa pagserbisyo ug pagkab-ot sa kalamposan. (RNQ/SP)







Comments