Paghinlo sa mga kanal prioridad sa brgy Carmen

Usa sa gihatagan og prioridad sa konseho sa Barangay Carmen nga mapatuman karong tuiga mao ang paghinlo sa mga kanal.

Kini human ang konseho sa syudad sa sesyon kagahapon nga gidumala ni Bise Mayor Jocelyn Rodriguez misagop sa resolusyon nga nag-uli sa ordinansa sa barangay diin nasukip ang ilang 2023 Annual Budget nga adunay gibanabanang kinitaan ug galastohon balor P95.6 milyones kapin.

Gihatagan og prioridad sa barangay nga mapatuman mao ang proyekto paghinlo sa mga kanal nga kapin sa P7.03 milyones, pagpalit og usa ka unit nga mini dump truck balor P2 milyones, pag-instalar og suga sa kadalanan balor P2.5 milyones, pagtul-id sa multi-purpose building balor P600 mil ug pagrehabilitar sa multi-purpose building –Day Care Centers balor P2milyones.

Gigahinan usab og igong pundo ang mga programa ug proyekto sa Sangguniang Kabataan ug uban pang mga programa ug proyekto nga gilantaw’ng maghatag og dugang kalamboan sa barangay ug kaarangan sa kinabuhi sa ilang katawhan.

Ang resolusyon nga gisagop sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ug reglamento ni Konsehal Ian Mark Nacaya.