Paghatag higayon sa mga negosyante pagtuman sa ilang mga kakulangon, gihangyo ni konsehal Goking

SI Konsehal George S. Goking, chairman sa komite sa Trade and Commerce og Ways and Means misugyot nga hatagan sa higayon ang mga negosyante sa billboard industry pagtuman sa ilang mga kakulangon nga gisitar sa balaod.

Kini ang gipahayag sa konsehal atol sa gipahigayong Meet The Press sa miaging adlaw human gihisgotan ang mga isyu sa structural permit o building permits.

Gipasabot ni Goking nga labing maayo kon mahatagan sila sa panahon nga ilang masunod ang tanang rekisitos aron usab dili mawad-an panginabuhian ang ilang mga kawani labina niining panahon sa pandemya.

Hinoon gibutyag ni Goking nga gikinahanglan sa kagamhanan ang buluhisan nga magamit sa pagpatuman sa mga proyetko apan gikinahanglan usab nga adunay due process of law sa dili pa himoon ang pagdemolis sa ilang mga straktura.

Kon adunay dili pagsinabtanay sa mga negosyante himoon ang panagtagbo aron usab makab-ot ang win-win solusyon alang sa kalinaw ug panaghiusa tali sa kagamhanan ug mga negosyante, pamahayag ni konsehal Goking.