Paggamit sa standard nga circuit breakers sa kabalayan giaprobahan sa konseho

HAYAN malikayan o makunhuran na ang kaso sa sunog nga gakahitabo sa syudad labina diha sa mga residential areas.

Kini human ang konseho sa sesyon niadtong Lunes nga gidumala ni Bise Mayor Kikang Uy mipalabang og ordinansa nga nag-require sa paggamit og standard nga electrict circuit breaker isip minimum nga spesifikasyon alang sa tanang kabalayan.

Tumong sa maong ordinansa nga maminusan ang kaso sa sunog nga natigayon sa syudad nga diin kasagarang hinungdang niini mao faulty electrical connection ug ang pakyas nga paggamit sa standard nga circuit breaker.

Segun sa pagtuon nga gipahigayon sa Center for Inclusive Development Studies (CIDS) sa University of Science and Technology of Southern Philippines (USTP) nga giulohan og “Policy Intervention of Loss of Life and Damage to Property in Fire Prone areas of Cagayan de Oro,” nasayran nga electrical short circuit ang nag-unang hinungdan sa sunog sa tuig 2018 ngadto sa 2020.

Nasayran nga ang maong lakang hugot usab nga girekomendar sa City Risk Reduction Management Department (CDRRMD) kinsa mitaho nga kasagaran sa hinungdan sunog diha sa mga populated areas mao ang faulty electrical connection.

Ang ordinansa nga gipalabang sa konseho alang sa maong katuyuan gipaluyuhan sa komite sa public order and safety ni Konsehal Romeo Calizo ug komite sa pamalaod ug reglamento ubos ni Konsehal Ian Mark Nacaya.