Paggamit sa side lane sa dalan nga parking area sa CUMC clients gihangyo

HUGOT nga gipaabot ni Konsehal Eric Salcedo, chairman sa komite sa environment and natural resources, ang mulo sa kadagkoan sa Cagayan de Oro University Medical Center (CUMC) mahitungod sa problema sa parking space.

Sa sesyon sa konseho niadtong Lunes nga gidumala ni Bise Mayor Kikang Uy, si Salcedo mitaho sa iyang nadawat nga hangyo sa kadagkoan sa CUMC nga matugutang temporaryong makaparada ang sakyanan sa ilang mga kliyente sa horizontal side lane sa dalan dapit sa ilang main entrance samtang padayon nga gitrabaho ang laing edipisyo sa hospital.

Gipasabot nga limitado lang ang makaparada sulod sa compound sa hospital tungod sa gihimong project expansion gawas pa nga nagkadaghan usab ang ilang mga kliyente.

Matod ni Salcedo nga kinahanglan nga maaksyonan kini sa labing dali nga panahon kay daghan sa ilang mga kliyente ang naapektohan sa kakulangon sa parking space sa maong tambalanan.

Ang maong taho ni Salcedo giduso ni Bise Mayor Kikang Uy ngadto sa Komite sa Roads and Trafffic Management ni konsehal Romeo Calizo alang sa dugang pagtuon ug rekomendasyon.