Paggamit sa Ivermectin angayan tun-an sa mga expert - Abaday

SI Konsehal Roger Abaday, chairman sa komite sa Senior Citizen, mibutyag nga panahon na nga hingusgan sa mga health expert sa goberno ang hugot nga pagtu-on ug aron mawala usab ang kalibog sa katawhan kabahin sa Ivermectin nga matud pa makatambal sa Covid-19.

Kini ang gipa-ambit nga reaksyon ni Abaday sa special report nga gipadangat ni Konsehal Enrico Salcedo kabahin sa epekto sa Ivermictin diin gikabutyag nga dako ug tabang sa pasyente nga nakasinati ug Covid-19.

Sumala ni Konsehal Abaday nga bisan ang mga doktor sa nasud na bahinbahin ang mga hunahuna ug opinyon kalabot sa maong isyu busa angayan nang hingusgan ug tun-an sa mga experto aron makalihok na dayon ang goberno sa pagtabang sa katawhan.

Dugang pa niini nga kun aduna nay panugot sa Food and Drug Administration (FDA) ug sa Department of Health (DoH) ang paggamit sa Ivermictin isip alternatibo nga tambal sa Covid-19 hayan mokunhod ang kaso sa Covid-19 sa nasud, sumpay ni Abaday.

Nunot niini gisugyot ni Abaday nga mapadali ang pagtoon niini aron mahupay ang hunahuna sa katawhan.